否認發明星夢！蘇煒喬：我追嘅係態度
20180413
東網電視
更多新聞短片
Ivan今日上電台宣傳新歌。
歌手蘇煒喬（Ivan）今日到電台宣傳新歌《筷子》，他介紹說：「今次係一首情歌，筷子本身係一對對，如果分開咗就會冇用，好似人生咁，一對陪伴你嘅筷子可以陪你嘗遍生活中嘅甜酸苦辣。」
感謝身邊人開解
入行兩年，Ivan坦言心態上有轉變：「以前會覺得唱歌就要攞獎，依家發現只要Keep住有新歌出其實已經好好。當你覺得自己捱緊嘅時候，身邊有好多人都陪緊你一齊捱。」他感謝家人和同事的開解和輔導，因自己曾有想不通的時候：「自己辛苦做出嚟嘅、正正經經嘅音樂未必可以聽到反應，一啲玩噱頭嘅反應反而會好，就會諗我係咪應該搞笑啲呢？但係咁樣就違背咗自己鍾意做音樂呢件事，個人會有迷失，唔知堅持緊啲咩。」Ivan放棄入行前的銀行工作轉做歌手，他否認自己發明星夢：「我唔係追夢，追嘅係一種態度，人生係需要有閱歷，雖然同以前收入差好遠，但係見證住整個團隊努力去做好一件事，就知道大家都係做緊熱愛嘅事情。」
感謝師傅
Ivan特別多謝師傅雷有輝：「喺歌唱呢條道路上，師傅真係幫咗我好多。每當我有問題，佢都係虛位以待，同我去傾、去面對，又同我分享佢哋以前係點樣捱，叫我堅持落去。唔止佢，成隊太極樂隊都好似大哥哥咁對我好好，今晚佢哋開演唱會，我一定會去支持，祝佢哋演出成功！」
----------------------------
東網巨星開咗ig喇，大家快啲follow啦！