老猫燒鬚！趙學而首次紅館騷蝦碌甩嘴

歌手趙學而明年入行三十周年，昨晚在紅館舉行個人演唱會。除建築師老公撐場外，圈中好友陳奕迅、江若琳與蕭潤邦、袁詠儀、蔡一智夫婦、蔡一傑、廖碧兒、薰妮、陳曼娜等亦現身捧場。

舞台設置為三面台，布置帶太空風格，趙學而身穿五彩長紗裙於舞台正中間飄逸登場，以大熱歌曲《其實怕選擇》打頭陣。然後又在兩名女舞者伴舞下唱出一連串兒歌串燒，到唱完《千年女王》，她脫去五彩紗裙露出內裏一襲大露背的銀色閃亮連身褲裝，配上貼服短髮，性感又帥氣，她問口向觀眾說：「大家好！多謝你哋喺度見證住我入行30年嘅第一個紅館演唱會。我依家好緊張！我知道一定會有前輩話企喺個台度要淡定啲，但係我真係好緊張！企得喺個台度就係要同大家分享我嘅心情！好多人都話趙學而係大家嘅集體回憶，我都想畀大家了解我細個時候嘅回憶，以下落嚟嘅歌要帶畀大家戀愛嘅感覺。」之後她就唱出四首電視劇主題曲。

唱完電視劇主題曲，趙學而笑言：「頭先嗰啲歌應該冇乜幾多個人識，有啲人可以演過一套戲就攞最佳女主角，亦都有啲人出道廿幾年先至唱到第一個紅館演唱會，其實兜咁大個圈都係想返來我身上啫，以下落嚟帶畀大家一啲甜蜜嘅歌。」之後她就唱出《浪漫就是》及《尋人》，再換上第三套鮮藍色斜膊長裙重新出場唱出《反叛情歌》。

懶靚出事

到要唱出經典歌《每隔兩秒》時，她卻發生蝦碌情況，當樂手在台左邊以長笛吹出前奏，趙學而從台右邊緩緩走近卻疑似唔記得入key以致甩嘴，樂手停下音樂，趙學而笑道：「唉呀！竟然老猫燒鬚，等我仲懶靚咁行過來添！」場面惹笑，然後樂手重新吹奏，觀眾打開手機燈以示支持。

----------------------------

東網巨星開咗ig喇，大家快啲follow啦！

https://goo.gl/KGuo2N