秋官汪明荃唱法不變　張偉文：點解唱到咁耐

「民歌天王」區瑞強（Albert）將於5月11、12、13日假伊館舉行《區瑞強粵唱越經典演唱會》以靚歌會知音，日前就相約友情逾40年的好友張偉文（Donald）擔任其電台節目嘉賓，兩位「靚聲王」鬥唱經典歌。

Albert慰問完接受腰椎手術、足足休息了近年半的Donald近況後，Albert話欣賞Donald唱得之餘，亦欽佩他為人夠直率：「冇人夠膽講，佢都照講，有時真係令我抹一額汗。」

兩人談及當年擔任歌唱比賽評判是最怕忍笑，兩人說：「因為有時啲人真係唱得好難聽，我哋就忍唔到笑。」Donald就說：「關正傑成日整跌支筆，好耐都未執番上枱。」Albert踢爆：「因為匿喺枱底笑。」Donald再說：「但個背脊呃唔到人，因為已經笑到震晒。」

Albert又說到鄭少秋配汪明荃是經典組合，Donald卻說：「我唔明點解佢哋可以唱咁耐囉！幾十年都不變嗰啲唱法。（係讚定彈？）梗係讚啦，如果唔係佢兩個人點會唱得咁好聽呀。」Albert即刻打圓場說理解，不應為改變而改變。但Donald似不認同，指已故巨星羅文都接納他要改唱腔的提議：「佢嗰種梗頸四嘅唱法，一同佢講佢，後期都冇晒啲《小李飛刀》聲。佢唔係接受批評，只係佢好睇得開。」而Albert亦爆跟羅文一段有趣往事：「嗰次請羅文做電台嘉賓，佢詐型問點解要唱咁耐，點知唱咗三個鐘，我話節目完要播新聞，羅文話要繼續唱，叫我cut咗新聞，我話唔得，佢就嬲嬲地咁走咗。」