擺黎耀祥上枱　陳志雲王喜有味笑話谷騷

陳志雲裝扮成綠色傘兵造型出席宣傳7月他舉行的演嘢會，面和頸都塗滿綠色，非常出位。志雲出場時極為興奮，現場擔任司儀的王喜亦好high，陳志雲興奮瞓地拍照時，王喜講笑志雲「典地」是扮溫碧霞，陳志雲扮嬲作狀要打王喜，而陳志雲亦頻頻寸王喜：「做咗咁多年司儀，仲要睇稿讀，我對你好失望。你做TVB做得唔好，做電台一陣又走咗，依家去有線，唔知會唔會拖累埋有線。」陳志雲講明演嘢騷不講政治，提到會邀請謝安琪、張繼聰和黎耀祥等做嘉賓。

提到陳志雲早年的涉貪案，黎耀祥亦曾作供，故陳志雲表示與黎耀祥關係好深長，王喜即偷笑：「佢長定我長？」志雲說：「視乎角度及功能性。」王喜講笑說好妒忌。陳志雲解釋以傘兵造型出現代表自己衝鋒陷陣，尋找夢想、工作、愛情和自己。即將60歲的志雲，稱60歲並不是一個關口，尋夢永遠不遲。他又呼籲市民寄半身照給他，便有機會出現在他的騷。問到會否與黎耀祥再飯局？他說：「賣吓關子，（王喜呷醋？）佢好戲啫，佢以前拍《緝私群英》佢做男一，同譚小環兩個都唔識做戲，反而黎耀祥做三綫，都唔知曾勵珍憑乜畀王喜做男一，樣貌平庸，演技一般。」又取笑對方早前出寫真只出五本，所以才賣斷市：「邊個有佢本寫真，inbox我，我畀佢上台。」此時志雲召喚王喜到身邊，王喜笑說：「你當我工人？」

陳志雲說透露剛收到演嘢騷的主題曲，笑言希望能得到樂壇頒獎禮「生銹鐵獎」又說：「黃子華就金盆?口，我就金盆開口，如果我賣唔晒飛就即刻變最後一場。」