途人跪低點唱　劉卓軒新歌背後故事極感人

新人歌手劉卓軒（Hinry）最近推出新歌《流水落花》，他在訪問中大談新歌的創作意念，原來背後有個感人故事：「係一個真人真事，我有一段時間定期會喺觀塘海濱busking，有一日我唱緊歌，突然有個三十幾歲嘅男人衝過來半跪喺我面前，仲要雙眼通紅，我初初好驚，以為遇着癡線佬，我即刻叫佢起身先，問佢咩事。佢話我嘅歌好感動佢，問我可唔可以有個請求，原來佢想點唱陳奕迅嘅《落花流水》，送畀佢離開咗嘅老婆同小朋友。」

Hinry表示事後被對方的故事所感動：「後來每個禮拜五佢都會出現，每次都好似好醉咁，我覺得好奇，於是開始同佢傾計，原本喺八年前佢準備結婚嘅時候，佢未婚妻因為一個意外跌咗落水，救唔番，其後先知佢哋當時已經有咗BB。因為佢哋一直都好想要一個女，於是就認定個BB一定係個女仔。佢思想好傳統，覺得係個天要懲罰佢未結婚就有咗BB，所以個天要拎走呢個生命，連埋個媽咪一齊拎走。我唔知可以點樣去安慰佢，始終我又未經歷過呢啲嘢，於是我就寫咗呢首歌送畀佢。」