碧咸幫「死侍」谷戲　笑爆賴恩曾為爛片王

由加拿大型男賴恩雷諾士（Ryan Reynolds）主演的另類超英片《死侍2》（Deadpool 2）即將上映，近日搵到「萬人迷」碧咸（David Beckham）幫手拍宣傳片谷戲，賴恩不惜將拍過不少爛片的黑歷史擺上枱，畀咸爺盡情恥笑！

碧咸於宣傳片中，最初在家中睇緊「死侍」在第一集笑他的聲音似吸入氦氣的場面，突然就見到「死侍」傳來的道歉訊息，他更親身上門送曲奇、氣球與唱歌等求碧咸原

諒，最後送到世界盃波飛先令碧咸溶化！不過碧咸就表示「死侍」笑他把聲根本唔重要，「死侍」即問：「咁你以為我因為咩而道歉？」碧咸即列出賴恩拍過的一埋爛片：「《綠燈俠》（Green Lantern）、《衰鬼刑警》（R.I.P.D）、《Self/less》《幽靈刺客III終極屍殺》（Blade Trinity）與《Boltneck》。」「死侍」即時大叫，指《Boltneck》為神作，之後隨即發現太激動又激嬲碧咸，耍冧都搞唔掂，場面搞笑！賴恩於碧咸各自於社交網上載宣傳片，前者晒合照多謝碧咸出山幫忙宣傳。

此外，「死侍」又學《復仇者聯盟3：無限之戰》（Avengers：Infinity War）導演羅素兄弟（Russo Brothers）出公開信叫粉絲唔好劇透，羅素兄弟被抄橋即於社交網搞笑以「Thanos」的中指回應！