有逾百件性感睡衣！羅霖着上身驚仔仔睇到

藝人朱慧敏（Queenie）、羅霖（Candy）及曾華倩出席內衣品牌新品發布會，問對內衣要求是否很高？Candy表示非常高，以前做空姐時會經常從世界各地搜羅內衣褲，特別喜歡絲質和Lace，她表示：「我依家有三個仔，平時喺屋企着啲睡衣，我會擺定件衫喺床頭，見到佢哋時會即刻遮住，否則太性感。」她直言屋企有百多、二百件性感睡衣，會分別着上或收藏，而且咩顏色都有，唯獨沒有SM款，她透露：「會留番重要場合着，例如情人節或者特別紀念日。」

曾華倩朱慧敏愛絲質內衣

而曾華倩就笑言穿性感睡衣要睇時候：「有男友時咪要求高！但我依家冇男友。」她表示其實唔一定要穿給另一半睇，反而給自己睇都好開心，而她亦特別喜歡絲質內衣：「好滑，着咗等於冇着，感覺好女人。」至於Queenie亦認同說法，仲話覺得絲質好柔軟，認為女性需要好好愛惜自己：「無論有冇伴侶都好，有時照吓鏡，沖完涼見到都好開心。」

羅霖鍾情小鮮肉

Candy表示穿上睡衣可鼓勵女士身材Keep得更好，讓自己變得愈來愈靚：「加上夏天快到，要Keep得好啲，我哋差唔多年紀，又係媽媽都算係咁，互相鼓勵。」雖然當上媽媽，Candy表示很喜歡小鮮肉，因為可逗得她開心。而Queenie笑指喜歡成熟型「臘肉」，至於曾華倩表示不會特別挑選，並取笑Candy有經驗，Candy續說：「我都唔係特別揀，係咁啱遇到，最緊要大家溝通到。」