許冠傑開騷望再瘦10磅　阿倫Keep Fat唔操

歌神許冠傑（Sam）和樂壇校長譚詠麟（阿倫）為8月5至12日紅館舉行的《歐洲坊呈獻阿SAM &阿TAM HAPPY TOGETHER PART II金曲速遞演唱會》開記者會，今次演唱會以金曲速遞為主題，兩人以速遞員造型現身，阿Sam彈着結他與阿倫唱出多首金曲《世事如棋》和《朋友》。

阿倫輕咗10磅

講到Part II的Rundown，阿倫稱上次只唱到阿Sam不夠三分一的金曲，還有三分二歌未唱，今次每晚都會換一些不同歌，阿Sam更為報答歌迷支持，會將舊曲填上新詞，又稱：「仲會有好多舞跳。」阿倫就謂已找來排舞師Sunny為舞步加辣。阿Sam說：「動感多啲好睇啲。」問兩人可需要Keep fit？阿倫謂：「佢Keep fit，我keep fat。」阿Sam則打算再瘦10磅，而阿倫謂：「之前返內地做一個戶外騷，啲汗出到底褲都濕晒，就已經冇咗6磅，之後再飲咗7碗嘅胡椒湯跟住去埋水，冇埋4磅，咁我就輕咗10磅。」

偶像話乜就乜

阿倫指阿Sam三個月前已keep fit，現不用減只須操肌肉結實。問到阿倫若阿Sam要求他一齊操fit會否答應？阿倫笑言：「如果佢開口都會做㗎，唔開口就算啦，大家好過啲嘛，咁佢係我偶像，要求我做乜我都會做嘅。」阿Sam謂屆時開騷便會瘦。

加場睇阿Sam

講到會否再加場？阿倫笑言：「阿Sam夏威夷好多親戚，真係睇佢啲飛有冇畀人追甩褲先決定啦。（唔開日場？） 阻住阿Sam湊孫喎。」但阿Sam稱加場與否最緊要是大家Happy。