何緯豐拎完「男配角」：我Enjoy做幕後！

「香港微電影之父」何緯豐（Vincent）讀電影出身，並身兼導演、監製、演員，更於早前北京舉行嘅「中國微電影大典金蜂鳥獎表彰禮」上憑網絡電影《風速時光》獲得「最佳男配角」殊榮，問到會否轉向幕前發展？Vincent坦言沒有這個打算：「呢個真係冇諗過，我知道做幕前有另一種壓力，我非常enjoy做幕後，偶一為之就當係擦身而過嘅緣分。拍電影我哋好多時要入組，大電影一般係30至50日，嗰次就適逢其會，啱啱呢條片喺西安拍，導演係當地人，同我識咗好耐，叫我過嚟俾吓意見，我咁啱放假就過咗去，順便睇吓劇組，之後佢就畀咗個角色我做。」對於獲獎，Vincent笑指是一個巧合，領獎時更遇到獲頒「最佳男主角」的好友朱永棠。

講到身兼多職，近年還多了投資人身份，對此Vincent表示：「我睇咗本書，佢話人生去到某一個年紀，投資人會係你最後嘅職業。」Vincent自言眼光一向不俗，除了天賦，更多的是經驗的累積，他說：「要試過好多失敗、好多評語、好多人嘅拒絕，先做到一個有判斷能力嘅投資人。」而Vincent出品的其中一套網絡電影，最近人氣急升的藝人陳家樂亦有份參演。

此外，Vincent現為理想集團旗下理想新媒體集團的執行董事、美亞淘夢有限公司行政總裁及監製，並與王祖藍的製作公司簽訂5年20套網絡電影，他表示雙方以劇本為準，對劇本要求很高，講到祖藍會否參演其中？Vincent坦言：「第一次合作好愉快，祖藍係出品人嘅身份，包括會同我哋度劇本，會睇埋劇本正唔正，要去到5、6稿，千錘百鍊先落實，佢呢方面把關得好好，嚟緊日子會唔會做參演者，就要問番佢，因為佢係大忙人。」

場地：Mezze7 七重天