Mr.出道十年！Tom畀仔仔寸未夠班教佢打鼓

樂隊Mr.、Kolor、野佬（Yellow！）、觸執毛及ToNick一同出席於8月尾舉行的音樂節記招，五隊樂隊同時眾集會場非常熱鬧。他們分組上台宣傳音樂節，又呼籲在場Fans買飛，主辦單位亦宣傳最後一場將會由三位台灣猛將丁噹、閻奕格及盧學叡擔任嘉賓。

默契仍在

Mr.於活動後受訪，問到事隔多年再喺香港開騷默契還在？成員Tom（杜志烜）好有信心話夾咗Band十年，默契冇唔見到，笑話：「只係啲手指會生疏咗。」他們又指一直都有做內地巡演，默契一直都在。Mr.現身份為獨立樂隊，自由度可有大增？他們表示都有多咗空間去沉澱：「都好感恩今次可以參加音樂節，又適逢樂隊出道十周年，之後都會忙住準備十周年音樂會，希望呢段時間多啲公開演出見Fans。」會唔會好期待再見Fans？Mr.續話當然期待，又指之前於內地開騷都會有香港Fans專登飛去支持。問到幾時會出新歌？主音Alan（布志綸）表示都需要時間：「因為之前每人都喺唔同嘅崗位工作，依家再做歌要時間。」不過眾人再次重申好開心可以再踏上香港嘅舞台同Fans接觸。

「你聽吓人哋呀！」

講到最近古巨基演唱會上有位五歲「小鼓神」，同樣育有一子的Alan及Tom都話有留意到，問到會否培養仔仔打鼓、唱歌？二人同笑話：「自己識打鼓、唱歌，個仔都未必叻。」其中Tom仲大爆上次帶埋仔仔去聽美國人氣男歌手Bruno Mars演唱會，被仔仔問：「你聽唔聽到啲鼓聲呀？你聽吓，你聽吓人哋呀！」Tom無奈話：「佢覺得我未夠班教佢。」身旁嘅Alan安慰話：「咁都有天分呀，我都唔知我個仔有冇天分。」