未探到黎明B女　雷頌德：仲封閉緊

音樂人雷頌德（Mark）到中學出席布道會，表示會分享信主前和信主後的改變，希望令到更多人歸向主。問到屋企人可有來捧場？他表示：「其實今日另一邊廂係我大仔中學畢業禮，本身太太都想嚟，但因為撞咗時間，大仔又要演講，所以一定要有一個去聽，我陣間都會趕去。」

嗌好友慢慢學

而講到好友黎明喜獲囡囡，他謂仲未探到BB：「暫時仲係封閉緊，我話可以嚟探嘅時候就出聲啦，我梗係想睇。（佢有冇send啲相畀你睇？）未呀，我都好奇想睇。」講到黎明直斥爆料者是「漢奸」，他了解事情後，笑言：「好難冇人爆喎，實有人爆㗎喎。（覺得佢咁樣激進咗？）明白為人父母關於仔女事一定激進，所以絕對可以明白。（陳慧琳勸黎明要調節心態，唔保護得個小朋友太耐？）係囉，咁佢呢方面仲係新手，我哋老手啲嘅，佢慢慢學吓啦。」

堅拒再生

問到可會傳授湊B經畀黎明？他笑言：「唔使啦，佢咩都有自己一套，所以佢自己研究出嚟得㗎啦。」問到可已經預備禮物上去探BB？他表示：「等我知道幾時探就買，可能會送衫仔，因為我買極都係BB仔衫，買吓BB女衫都幾開心。（你都追番個女咪得？）如果我生得出就生咗。（仲會唔會再生？）梗係唔追！依家幾個都搞唔掂，仲整多個。」

信主全因太太生病

另外，Mark在台上分享信教經過，表示信教全因為太太：「太太身體不適，有朋友嚟我屋企幫佢祈禱後，太太感受到神嘅存在，仲信咗，佢好感動，佢本身係驚個病係好嚴重，驚係cancer，我就諗既然太太信咗，所以我就同神講，如果可以醫好太太，咁我就跟你，之後到第二日太太攞到份報告，證明唔係cancer，神即刻畀到答案我，我好感動，所以就跟佢。」