胡定欣殺死陸詩韻？《深宮計》大玩推理橋

無綫新劇《宮心計2深宮計》21日首播，原本講明香港有得睇之外，仲話會喺內地同步網上播出，點知喺香港播完第一集，內地竟然都係冇得睇，唔少網民都嬲豬鬧爆，最終相關嘅內地網站要喺官方社交網發文道歉，仲話希望大家畀多少少時間佢哋去處理問題。香港方面一啲都冇受影響，尋晚播出第二集劇情好緊張，飾演太平公主嘅陳煒為咗要肅清異己鞏固自己嘅勢力，佢就借住大王子李天翔嘅老婆陸詩韻之死大造文章，矛頭直指平王馬浚偉老婆胡定欣，指胡手臂有傷痕，完全吻合陸詩韻死前掙扎抓傷兇手嘅情況，究竟胡定欣係唔係殺人兇手就要留待下回分解！