側手翻響朵 阿嬌入行17年成長點滴
20180526
東網電視
更多新聞短片
回顧下嬌呢17年嘅點滴。
歌手鍾欣潼結婚啦，入行17年嘅佢帶畀粉絲好多美好回憶，依家佢終於搵到個好歸宿，大家都好戥佢高興！相信好多粉絲都知道鍾欣潼原名鍾狄珊，兩歲時改名鍾嘉勵，入行後改用藝名鍾欣桐，2013年8月先改名做鍾欣潼，當時仲有指佢將「桐」改成「潼」，係因為要增加姻緣運！而英文名就一直都係用「Gillian」，暱稱阿嬌。雖然阿嬌中文名改咗四次，但無論點改都好，都改變唔到粉絲對佢嘅愛。
阿嬌出道以嚟，星途亦算順暢，佢2000年同英皇娛樂簽約，同蔡卓妍（阿Sa）組成女子組合Twins，2001年以歌曲《明愛暗戀補習社》出道，當年兩位小妹妹憑住打筋斗活力形象一炮而紅，仲橫掃年底各大樂壇頒奬禮中所有新人、組合獎項。2002年9月，當時得21歲嘅阿嬌同19歲嘅阿Sa喺紅館舉行演唱會《Ichiban興奮演唱會》，成為首位女子團體同最年輕喺紅館開個唱歌手嘅紀錄保持者，都真係幾威水！
除咗歌唱事業之外，阿嬌都有參與電影拍攝，2004年，佢憑電影系列《千機變》喺台灣走紅，粉絲遍布中港台。2005年仲首次憑電影《公主復仇記》獲提名第10屆香港電影金紫荊獎最佳女主角殊榮。
事業得意，阿嬌喺娛樂圈17年亦收穫咗友誼，佢嘅圈中好友除咗好拍檔阿Sa之外，師姐容祖兒都係佢嘅閨蜜，三人仲合組「龍虎豹」，多年嚟一直互相扶持，2017年三人仲首度合唱單曲《全副武裝》。
----------------------------
東網巨星開咗ig喇，大家快啲follow啦！