參戰健美小姐　黃榕湯沛宜成績驕人嗌開心

藝人黃榕與湯沛宜（ToTo）昨晚參加比堅尼健美小姐錦標賽164cm以下女子組賽事，分別奪得第四及第六名，成績驕人。談到今次排名，黃榕大感滿意：「其實冇諗住可以入到前六名，仲要攞埋第四名，真係好開心。今次係第一次參加，冇諗住攞獎嘅心態，主要係攞經驗。我之前拍完舞台劇，得一個月時間去訓練，其他參賽者起碼訓練半年，而且佢哋做健身又做咗咁多年，所以對我嚟講已經係贏咗冠軍，非常之興奮！同埋好多朋友嚟打氣，幫我嗌到喉嚨都痛，好感動，感動到眼濕濕。」她又表示比賽完成後即跟朋友食飯慶祝。

至於ToTo能進身六強，她指對自己來說已是超額完成。ToTo表示：「因為身體狀況問題，到最後階段反而放慢咗操練，但呢個係一個好好嘅經驗，希望下次再接再厲有更好成績。今次好開心，因為身邊嘅朋友好幫自己，好似眾志成城咁做好呢件事，我同黃榕都好享受呢個比賽。」