三弟妹患癌離世　林燕妮靠襌修走出陰霾

一代才女林燕妮離世，無綫今日凌晨重播林燕妮特備節目《懷念林燕妮　向世界出發》。節目開首，林燕妮已道出對「無常」、「生死」的看法：「人生係無常嘅，做人只可以勇敢面對！」面對生離死別之別，林燕妮淡然說：「要超越死亡、接受死亡！」

節目中提到林燕妮出生於幸福富裕家庭，所有物質生活都可以垂手可得：「冇乜嘢係想要而得唔到嘅！」爸爸從商，媽媽任家庭主婦，家住三層樓的獨立屋，出面有花園、有車房，除了三弟妹，屋企還有多個傭人，生活無憂。

身為家中長女的她，自言最痛錫林振強與林雁妮：「我哋四姊弟妹感情好好，我同大細佬（林振強）感情最好，亦好錫妹妹（林雁妮），因為得一個妹，細細佬（林振剛）後生時好乖，成年後就奀皮啲。」

之後面對爸爸離世以及經歷弟妹林振強、林振剛與林雁妮因淋巴癌病逐一離世，令她打擊甚大！但面對生死，林燕妮只能面對：「我家人咁短命，一個、二個咁走，我係冇得控制，惟有喺佢哋病嗰陣盡量對佢哋好。」她亦坦言面對最疼錫的弟弟林振強離世，對她打擊至深：「有一日，我細佬打畀我，同我講『家姐救我一命』，我當時問佢咩事，佢話有淋巴癌，要捐骨髓，我即刻話好，我當時冇太大反應，佢亦好平靜。驗完之後，我同細細佬都可以捐，再驗發現原來細細佬都有cancer，當時撞正2003年沙士，真係好麻煩！佢（林振強）要住隔離病房，我哋靠email通訊，佢做完電療要戴口罩，一電療佢就嘔，同我講『要戴住個口罩嘔，你話幾好笑呢』，佢仲同我講笑，佢又影啲幹細胞相畀我，話『你抽出嚟嗰啲幹細胞就係咁樣，原來橙橙地色好似紅蘿蔔咁，真係好喇！我依家血裏面有你嘅血喇』。我哋好樂觀，一直聯繫到大細佬走為止。」

2003年，林振強離世不久，林燕妮的細弟弟林振剛亦因淋巴癌逝世。林燕妮滿眼通紅地說：「當屋企兩個細佬都走得咁急，走完一個都未傷心完，就到第二個，要你再震撼一次…當時我非常孤單，我係單親媽媽，我個仔細、媽咪年紀大，我要單獨面對世界。禪修可以令我面對世界同突然變化，我哋要超越死亡，接受死亡。」

林燕妮又指妹妹（林雁妮）很年輕便逝世，她看着殯儀館的人替對方化妝同着衫，她謂：「我個妹條眉好靚，係唔使畫嘅，佢哋攞支絨頭筆一畫，我話唔可以咁，但啲化妝師話畫咗唔抹得，咁稍微幫佢化吓妝，其實我妹妹好靚，佢唔使化妝，眼好大、鼻好高，我覺得我唔滿意個化妝，我話蓋棺啦！唔好瞻仰遺容嘞！」林燕妮指妹妹很刁蠻、很惡，但都沒有辦法，對方經常嗲她，叫她買東買西，但她都最疼錫妹妹。

林燕妮直言自己是靠襌修度過難關：「如果我冇禪修過咁多次，我可能接受唔到。好似振強咁，佢留低一啲歌、留低一啲『洋蔥頭』，留下好多好好笑嘅散文，佢不枉此死。我想同雲上嘅細佬妹講『唔使掛住我，唔使擔心，你哋繼續快樂，我搞得掂，我好有勇氣』。」

講到自細出生在富裕的幸福家庭，林燕妮坦言：「冇咩嘢係我想要而係得唔到，爸爸係商人，媽媽係家庭主婦，過住無憂無慮嘅生活，四姊弟妹、爸爸媽媽，仲有幾個傭人，住三層樓嘅獨立屋，出面有一個花園，又有車房。」