無懼子宮出血陰影　孫慧雪再試紮肚減肥

藝人孫慧雪自從上年生咗囝囝Riley之後，身形一直保持微胖，就連佢自己早前出席活動，都自言大隻咗好多。呢日孫慧雪終於下定決心修身，佢喺社交網晒出多張自拍照，相中見佢戴上非常貼身嘅紮肚帶，原來佢係試緊產後紮肚減肥法。佢透露自己其實之前試過一次紮肚，但因為發生小意外而停止：「我之前生咗3個月時紮過，但可能個人體質問題，或者子宮傷口太大（因為我係剖腹產兼生大碼B），所以產後三個月紮到第3日，就子宮出血，於是無再紮！」佢仲話原本以為生完要即刻紮肚先有用，但見好友黃婉曼生咗9個月先紮肚都成功，所決定重新開始紮肚，並笑指紮肚感覺似箍牙。