單拖落街獻唱　釗峰瞓身支持Busking文化

被形容為香港Busking（街頭賣唱）先驅的男子組合C AllStar，由旺角街頭唱到進駐紅館，成就不少街頭表演者的夢想。雖然C AllStar去年底宣布休團，並獨立發展，但他們對Busking文化的支持依然有增冇減，其中單飛後率先推出新歌的釗峰，日前走到銅鑼灣街頭玩Busking，跟街頭音樂組合「The Flame Music」Jam歌兼大玩medley廣告歌，吸引超過二百人圍觀，場面熱鬧。

孤單又興奮

Busking期間釗峰唱到大汗叠細汗，不過他無懼高溫說：「真係好熱，但Busking唔會諗咁多，唔會受到天氣限制，只係想同觀眾一齊情緒起伏，想享受呢吓感覺，所以天氣係阻礙唔到我。」今次Busking是C AllStar休團後，釗峰首次以個人身份到街頭表演，他坦言感覺既孤單又興奮：「未試過自己一個Busking，心情又緊張、又興奮、又正又孤單。今晚我唱咗好多medley廣告歌，夾雜咗好多歌，有我哋四個（指C AllStar成員）嘅飲歌，亦有自己廣告歌，似以前C AllStar砌medley嘅感覺。」

望保留文化

釗峰自言「瞓身」支持香港Busking文化，但他希望可以規限Busking的質素，他說：「呢啲係香港文化之一，其實韓國等地嘅Busking好成功，而且質素好高，所以希望香港都可以效法，令Busking文化值得保留。」而問到釗峰喜歡在街頭還是在紅館獻唱？他指Busking與紅館演出是兩樣不同東西，不能相提並論：「紅館係一個好大嘅團隊，要顧及舞台、聲燈、舞蹈等，但Busking鍾意點就點，無論overun定瞓喺度唱，都係自己嘅事。」

投資勁穩陣

此外，提到今次廣告歌關於投資虛擬幣的風險，問釗峰有否投資虛擬幣的經驗？釗峰表示投資從未試過賺大錢，亦從未試過蝕大錢，他謂：「唔識虛擬幣，亦冇呢個膽量去持有，因為工作太忙，冇時間去研究咁高風險嘅投資，寧願腳踏實地，我個人好穩陣，全公司都話我係最穩陣，所以我多數是買吓債券、藍籌等，好平淡嘅投資。」

----------------------------

東網巨星開咗ig喇，大家快啲follow啦！

https://bit.ly/2JjSVcr