周國賢IG激罕放閃　老婆肚凸凸似有喜？

已婚並育有三名女兒嘅歌手周國賢（Endy）喺2013年與助手傳出緋聞，韓籍太太李美英傳一氣之下更與三名女兒搬到加拿大生活，而Endy為挽救婚姻亦有隨行，更強調太太一直係「周國賢嘅老婆」，同助手劃清關係！作風低調嘅Endy，呢幾年都從未喺社交網晒過老婆嘅靚相，但近日佢似乎已氹掂老婆，仲同老婆去咗外地度假添！Endy其後更罕有喺IG放閃晒合照，並以王菲歌曲《你快樂所以我快樂》同埋自己歌曲《天使》歌詞留言：「你快樂　所以我快樂　#我不敢想太多　#我只想繼續做我讓你開心得更多」

相中背景係一片大海，Endy同老婆相對而坐，仲手拉手，相當恩愛！其中Endy老婆就着上低胸One Piece裙，仲隱約見到肚凸凸添，唔通Endy今次想出Post公布喜訊？有網民留言話好曬，仲講定恭喜，不過亦有眼利嘅網民話Endy老婆着咗一條鬆身裙，而且張相背光睇得唔太清，搞到大家可能有錯覺。其後，Endy亦開腔否認老婆有喜。