唔認係喊包　釗峰單飛做教授收集眼淚

梁釗峰作為C AllStar休團後首位單飛成員，為了宣傳第一首主打歌《月亮不代表我的心》，釗峰連日來走訪全港三十多個辦公室玩busking造勢，剛推出的MV，他化身「梁教授」以眼淚醫心病，他說：「平時啲朋友同Fans都嫌我講嘢長氣又多道理，嗌我『梁教授』，喺新歌MV我索性幽自己一默，化身教授收集眼淚，幫助別人發洩情緒。」而且他還邀請了二十幾位Fans飾演學生一同拍攝，參與第一首單飛歌MV留紀念。

MV故事中的釗峰收集不同情感而流出來的眼淚，透過「眼淚蒸發機」幫助無法哭出來的病人，結果連自己都醫好，成功流出眼淚。感性的故事，釗峰卻演得尷尬，他說：「每個人生理反應都唔同，而我喊嘅時候係流鼻水先過眼淚，加上最近唔係好夠瞓，鼻水比較多、顏色又唔靚，拍MV嗰陣幾乎變咗《喜劇之王》周星馳咁大篤鼻水跌出嚟，好尷尬！」講到喊，C AllStar每次開騷釗峰例必第一個爆喊，他卻否認是「喊包」，他笑言：「我喺台上畀佢哋三個冷血友易喊，但平時未必係我喊先，尤其係睇戲我好少喊。」