李克勤周國賢AGA開騷乘機對親家

歌手李克勤、周國賢及AGA（江海迦）在會展開騷，獲徐濠縈、梁漢文老婆林文慧、胡鴻鈞、余德丞、丁子高 及「的士邦」鄭子邦等人到場支持。三人一開始各自彈一種樂器出場，並合唱《只想你會意》。接着克勤率領周國賢及AGA向大家打招呼，克勤表示今次編曲很多不同，AGA就謂有8成半歌曲都是rearrange過，克勤續謂：「頭先我哋喺後台未出嚟時隻腳係震，比演唱會仲驚，因為好多嘢唔喺手，但有觀眾支持就得。」

克勤AGA早有淵緣

克勤亦謂接下來要唱的歌是定歌單時第一首寫下的歌，是AGA多年前寫給他的，然後唱出《鑽石人生》，唱完AGA表示這是她第一首寫給指定歌手的歌：「嗰時都幾驚，因為我三年都賣唔到歌，你係第一個say yes嘅歌手。嗰陣舒文話我3年嚟都係寫歌畀自己，但都賣唔出，不如試下寫畀人，所以我用兩星期聽晒克勤啲碟，知道克勤係好早開會揀歌，所以我用咗一晚通宵嚟追佢嘅會，第二日晏晝就收到電話，舒文問我：『你死得未？有人揀咗你嘅歌』，我嗰陣係唔只開心咁簡單！」

克勤大開黃腔

當周國賢唱完克勤的《我不會唱歌》後，克勤上台笑言：「你真係好勁，頭先我喺台下聽，覺得首歌直情係屬於你。」周國賢表示：「我緊張咗幾個月，唔明點解你唱呢首歌可以唔抖氣，你又唔係巨肺。」克勤即玩食字笑言：「我係「肺」，你自己彈埋唔同，我係搵咗好好嘅人彈，咪可以安心唱，所以你更勁。」之後他續謂：「我又係爸爸，你又係爸爸，點解你咁型，我最多只係襟睇。」周國賢就謂：「但我唔陽光，你係運動型。」克勤講有味笑話：「但你黑過我喎，即係我同人運動，你就自己運動。」之後他又乘機幫兩子約周國賢的三女「玩」：「你咁靚仔，雖然我就忟啲，但老婆靚嘛，大家都可以交流下。」全場大笑。

周國賢克勤撞橋

接着三人又出場，其中AGA的網紗上衣透Bra，周國賢講到他們三人的共通點是喜歡同一偶像，就是玉置浩二，然後就唱出一連串對方的日文歌。然後周國賢與克勤留低唱出《情非首爾》及《漢城沉沒了》，周國賢表示想不到會與克勤撞歌的橋：「仲要好似同一時間派台。」克勤笑言：「最榮幸係我寫嘅歌詞竟然同黃偉文撞橋，level即刻提升咗8級呀！」而AGA唱到新歌《小問題》時，與女舞蹈員跳舞。

AGA勁感觸

尾聲鳴謝環節時，當AGA鳴謝時，周國賢突然謂：「我想插你少少……」全場即大笑，自知講錯嘢的他即笑住解釋：「插你話題少少。」然後繼續尷尬笑：「搞到我面紅。」克勤即自嘲：「我都試過一次，冇事，我都仲企喺度唱歌。」然後周國賢續謂這是第三次參加拉闊，開心可以跟這兩位拍檔一起做拉闊。克勤亦向AGA笑言：「我算係睇住AGA入環球，見到佢由寫歌嘅人變做歌手，就嚟開愈嚟愈大型嘅演唱會，綵排時見到佢爸爸嘅笑容就戥佢開心，我算係半個師兄，如果將來有咩問題嘅話，你自己搞掂啦，因為大個女啦。」而AGA則謂今次是第一次參加拉闊：「未入行前我去咗好多地方彈琴同唱歌，但冇咩人會聽，因為啲人淨係食飯，第一次唱番啲歌有原唱者一齊，係好大嘅鼓勵。」克勤即笑言：「我深深體會到，因為我就係唱譚詠麟嘅歌。」最後他們各唱多一首歌就作結音樂會。

----------------------------

東網巨星開咗ig喇，大家快啲follow啦！

https://bit.ly/2JjSVcr