世界盃開波！影帝張家輝搵番失散球王美斯
20180613
東網電視
更多新聞短片
若要人似我，除非兩個我～世界盃總會搵到一個似我！
四年一度世界盃又開波，好多球星天生一副明星相，就算不分國界、不同膚色都可以跨越地域界限，跟港星撞樣。唔使驚，梗有美斯跟張家輝似到啪啪聲；講到蘇亞雷斯與雷莊?一認住佢棚牙；最誇係沈震軒竟然自認係尼馬......學黃興桂話齋，佢哋真係似到「神奇、頂級、超卓」呀！
（相似度：5隻世界盃滿分）
美斯（阿根廷）VS 張家輝 相似度：5隻
若要人似我，除非兩個我！阿根廷球王美斯跟香港金像影帝張家輝有多似不用多說，個樣似到以為同一個阿媽生。其實他們事業都好相似，美斯乜球會同個人獎項都攞過，只差世界盃冠軍加冕，長年被寸自己隊波是「亞軍廷」；至於家輝亦有個幾乎不可完成的任務，就是攞奧斯卡影帝。但家輝會比美斯容易成功，因為美斯有一班豬隊友。
蘇亞雷斯（烏拉圭）VS 雷莊? 相似度：4隻
千呼萬喚！有「咬人蘇」之稱的烏拉圭神鋒蘇亞雷斯絕對不能不提。全港市民幾乎人人都知咬人蘇跟就快卸任的港姐冠軍雷莊?似樣，二人一棚哨牙永遠深深烙印港人心坎中。雷小姐之前話要離開香港勇闖荷里活，其實真係可以去搵「咬人蘇」傾傾商機，說不定殺出條血路。
尼馬（巴西）VS 沈震軒 相似度：3隻
巴西代有球王出，今屆世界盃森巴兵團繼續有尼馬領軍。早前沈震軒無厘頭話自己天生混血兒樣，似足尼馬咁話。雖然佢唔怕畀人笑，但依家同尼馬一樣留了鬚，加上亂糟糟的髮型，又幾似孖兄弟。不過奉勸沈震軒勿似尼馬般寸寸貢，隨時畀人踢跛腳！
奧斯爾（德國） VS 陳友 相似度：3隻
德國10號仔奧斯爾（奧燒）今屆會帶領球隊衞冕，除了球技、懶散和踢波冇氣外，奧燒最多人談論就是他跟很多人撞樣，除了法拉利的創辦人Enzo Ferrari似到十足外，也跟香港的陳友似得交關，尤其是一雙招牌大眼，只嘆造物者太刻意了。不過陳友的魄力丁點也不似奧燒，奧燒揀波踢，陳友百足咁爪事事親力親為，就是兩者致命分野。
卡拉斯高（比利時） VS 周柏豪 相似度：3隻
現已轉戰中超球隊大連一方的比利時中場卡拉斯高，因為生得靚仔，向來都多女Fans，尤其「比比鳥」髮型跟香港男神周柏豪一模一樣，若柏豪留埋鬚，唔使Pass都可以走入比利時更衣室。老老實實，柏豪真係可以學卡拉斯高仰望神州搵人仔，不過首先要問過老婆先，你懂的！
奧祖亞（墨西哥） VS 吳鎮宇 相似度：5隻
睇相就知，墨西哥龍門奧祖亞跟Sam哥吳鎮宇有幾似，似到奧祖亞穿起機師制服、鎮宇穿起戴上龍門手套就可以直接交換工作。不過奧祖亞之前因為召妓風波搞到一身蟻，雖然唔使踢出國家隊，都搞到名譽掃地。向來不平則鳴的鎮宇一定要出聲，鬧爆奧祖亞踢世界盃要醒醒定定，洗心革面。
韋利安（巴西） VS 張敬軒 相似度：2隻
人人都知張敬軒係萬能Key，赫然發現，軒仔跟巴西翼鋒韋利安都好似，深邃的雙眼皮同蝦餃巴都係他們的標記，不同的只是膚色和南轅北轍的髮型。如今巴西成為世畀盃大熱，軒仔咁鍾意扮嘢，不妨整件巴西球衣、塗黑膚色、炸爆個頭，相信可以吸到好多Like！
沙拿（埃及） VS 徐榮 相似度：4隻
徐榮自己話過似好多球星，呢期他最似定必是效力利物浦的埃及神鋒沙拿。嗱嗱嗱！他們臉上鬍子分布驚奇地一樣，再加上炯炯的眼神，簡直孖生一樣。如今沙拿炙手可熱，但被皇馬茅躉後衛沙治奧拉莫斯摔交式整傷，埃及全國祈求沙拿快些好番，徐榮可以抱埋囡囡包包出來，為沙拿哥哥打氣唷。
----------------------------
東網巨星開咗ig喇，大家快啲follow啦！