勁Sweet！高Ling同爸爸互寫「情」信

父親節將至，向來是孝順女的高海寧（高Ling）一提起父親就滔滔不絕，她接受東網訪問時說：「我同Daddy嘅關係一半老竇，一半朋友，屋企由細教我，做人要光明正大，有乜事唔好瞞住屋企，屋企人永遠都會支持你嘅！呢個係一種教育，我係習慣咗無論發生乜嘢事，都會同Daddy講，佢都會分享佢以前嘅經歷畀我聽，我係好倚賴佢！」

高Ling還分享跟父親相處之道：「細細個我都有同Daddy鬧吓交，我亦會鬧吓情緒，始終大家睇法會有唔同，咁點化解呢？係我會寫信畀佢，寫晒內心嘅感受，寫完就攝入佢房門，Daddy睇完都會回番一封信畀我，呢個係一個好屬於我同佢嘅溝通方式。」

說到好似情侶拍拖般，高Ling即謂：「拍拖情侶嗌交都冇我哋咁Sweet呀！（有乜想同Daddy講？）我好想多謝佢，咁耐以嚟無論開心唔開心，佢都企喺我身邊，佢同我講，一世人，屋企人就係我嘅避風港，無論發生乜嘢事，都要返屋企，佢會一直拖住我行，呢件係一件好感動嘅事。事業上都試過唔開心，遇到樽頸、好多嘢，我都會返屋企同佢講，佢都總係可以將我嘅負面情緒拎走，鼓勵我繼續行落去。所以好多謝佢，多謝佢強勁嘅臂彎，永遠將我抱在佢懷抱內！」

----------------------------

東網巨星開咗ig喇，大家快啲follow啦！