唔係啩？燈神大埔LuLu撐港隊入世界盃

「大埔LuLu」董嘉儀喺今屆世界盃再次發揮「着邊隊波衫就輸邊隊」嘅「燈神」威力，着住德國波衫嘅佢，「燈」到德國對墨西哥0：1都未夠，又猛話睇好巴西，結果巴西同瑞士打和收場！大批網民猛呻，叫LuLu唔好再着佢哋愛隊嘅波衫，有啲仲爆晒粗叫佢小心「跌親」，LuLu完全避都冇避兼神回：「小心小心！」

同時唔少網民提出建議包括「真係好燈！拜託之後着波衫都唔該着荷蘭意大利！」、「LuLu姐，下次可唔可以早啲出post，我驚買唔切！」大家似乎係暗寸佢嘅倒米能力，諗住叫佢幫幫手喎！期間有網民仲話：「由下屆世界盃外圍賽開始，只要LuLu着香港對家波衫，下屆世界盃就係香港囊中物！」點知Lulu真係回應：「香港其實進步好多，而且，如果人哋冰島都等到佢地進軍世界盃一日，我哋都可以等到香港打世界盃嘅。」