張敬軒大方講關智斌：從來冇減少來往

歌手張敬軒一連6場紅館「HINSIDEOUT張敬軒演唱會」完成最後一場，軒仔多次感動落淚，由於觀眾反應熱烈，唱至11時58分超時完場。

Boy’z再做嘉賓

軒仔演唱會慶功宴上表示因為觀眾對很好，所以每晚都好感觸好感動。講到Boy’z即興上台第二度任嘉賓，軒仔笑言:「第一晚驚喜啲，升上嚟，今晚Boy’z一早坐在觀眾席。本身諗住今晚冇嘉賓嘅」軒仔續說第一晚完騷後有老歌迷表示失望，很多想聽的歌軒仔都冇唱，所以第二日軒仔即調整Rundown，都係想令歌迷開心。

做女人上癮

提起「降兩度」的造型，軒仔笑稱：「我本人就係斯文啲嘅，而「降兩度」把口就賤啲，所以，有個分身係好玩嘅。（真係剃腳毛？）係呀，晚晚都剃，咁有啲睇唔到嘅位咪唔剃囉，即係格肋底呀！原來剃腳毛都要成個鐘，要換兩塊刀片。（咁硬？）我堅挺嘛！（太粗生？）係出得好快，鬚都好啲，腳因為想佢睇上嚟有光澤就着絲襪，但太粗試過刮爛對絲襪，真係女人不易做。」

親自搵Boy’z做嘉賓

講到是他親自找關智斌（Kenny）和Steven做嘉賓？軒仔說:「係呀。（冇推你？）冇，但Steven真係推劇組飛返嚟。（唔尷尬咩搵Kenny？）唔尷尬，不嬲都唔尷尬，係等緊啲機會，冇平時啲收收埋埋，邊會有今次咁爆嘅核彈呀！（咁你都編排咗十幾年喎？）咁真係有紀念意義先搵佢嘅。（點報答佢？）我哋之間唔講呢啲。（咁講乜呀？）講心囉！講心唔講金嘛，心意嚟。」因之前有傳兩人已「斷交」，是否再見亦是朋友？軒仔笑言：「等我諗下點答先……其實咁耐以嚟我哋都冇減少來往，只係有時啲報導唔想出到嚟答怕愈描愈黑咁。（關係一直Keep住？）咁多年都係好好、好好嘅朋友囉，好Close嘅朋友，新聞又好傳聞又好，有啲嘢愈講得多愈無私顯見私咁，同埋啲花邊新聞，蓋過咗我哋嘅努力，關智斌唔會因為張敬軒而見報，而張敬軒亦都唔需要因關智斌而見報，呢個係我哋大家有時封口嘅原因。」

替胡定欣抱不平

而軒仔都逐一多謝容祖兒、陳慧琳、楊千嬅、胡定欣來做嘉賓，但問到可有留意網民說找胡定欣做嘉賓有點失望？軒仔稱都看不到太多，覺得網絡上的意見值得參考，但單看幾個留言就不太公平。

搞開騷門票好頭痛

至於有歌迷以「報失門票」入場而被拒門外，軒仔稱不太清楚這件事，但就他而言每次開騷門票都令他好頭痛，單他為歌迷會訂飛就墊支超過100萬元，但每次都有人甩底，今次他就硬食了幾萬元飛債，亦搞到開騷前凌晨三點他仍在分飛。

----------------------------

東網巨星開咗ig喇，大家快啲follow啦！

https://bit.ly/2JjSVcr