【你一定識】盤點周星馳那些年經典作品

講到一代笑匠，周星馳（星爺）一定當之無愧！皆因佢拍過無數經典作品，至今仍令人津津樂道，而佢獨特嘅表演風格、自創嘅對白真係無敵，每次大家都笑到喊呀！呢日，無綫「myTV SUPER」Facebook專頁就修輯咗周星馳多年嚟嘅經典作品，由當年嘅星仔變成今日嘅星爺，畀大家可以重溫舊日佢嘅拍攝點滴，大家都話佢咁多年嚟都係每一位觀眾心中嘅螢火蟲，一樣鮮明出眾，為觀眾帶咗好多笑聲，難怪網民都話好想佢重返幕前做戲啦！

當年，周星馳喺1980年加入麗的電視，喺電視劇《IQ成熟時》做特約演員。到1982年入讀無綫電視藝員訓練班後，佢喺兒童節目《430穿梭機》同譚玉瑛姐姐做主持，畀大家叫做「星仔」。之後佢喺兒童單元劇《黑白殭屍》系列中扮演主角「黑殭屍」，同曾華倩、譚玉瑛姐姐嘅場口深受大家歡迎，絕對係成長喺八十年代小朋友嘅童年回憶。然後，「星仔」亦開始拍劇生涯，喺最初嘅《香城浪子》、《射鵰英雄傳》等劇集中演小角色，直至1988年，佢開始喺劇集《大都會》有多啲重要戲份，其後更喺1989年嘅《蓋世豪俠》中正式擔正男一，相信劇中對白「飲啖茶食個包」，大家依家仍然記得！

後來，「星仔」亦有參與電影拍攝，仲憑電影《霹靂先鋒》奪得台灣金馬獎最佳男配角，慢慢升呢變成大家口中嘅「星爺」。而佢拍過嘅作品《師兄撞鬼》、《武狀元蘇乞兒》、《審死官》、《濟公》、《大內密探零零發》等，都係大家不容錯過嘅電影。好多網民都話睇完呢段片都話佢天生嘅喜感真係好正，仲話想即刻煲番佢啲戲，真係好掛住佢演戲呀！

網民有話兒：

ERIXXC BICX：想再睇星爺重回幕前做戲！

GIXAS MIVIDX：星爺冇得輸。

WIMO NNCCX：星爺係漆黑中嘅螢火蟲。

JJERX KLLICX：星爺喜感，真係好正！