歎茶變影寫真　胡說八道會名模上身

閨蜜團「胡說八道會」一向感情好好，呢日成員胡定欣、黃智雯、李施嬅、姚子羚及胡蓓蔚約埋一齊歎下午茶。雖然身在上海嘅胡杏兒未有出席，但就有單立文頂上，認真熱鬧。一班姊妹聚埋一齊，除咗「食好西」之外，當然唔少得瘋狂自拍啦。五個靚女先喺餐廳入面貼到實一實影大合照，然後再移師到出面嘅露天茶座繼續影到夠本為止。個個靚女一對住鏡頭就即刻名模「上身」，大擺煞食甫士，而胡蓓蔚亦親自操刀做攝影師，佢雖然着上斗零踭，但為咗幫好姊妹影靚相，更不惜瞓身踎低，認真落力。