掃大灣區六個單位　吳啟華自認擔心爛尾

近年不少人喜歡投資大灣區地產，有指藝人吳啟華早前亦掃了多個單位，記者就此事向他求證，他謂：「係，買咗樓花。（恭喜晒喎！）恭咩喜，都擔心會唔會爛尾㗎，呢啲投資呢，老人家都要做吓，如果唔係啲錢好快使晒！」問總共掃了幾多個單位，他指不是全數是他的：「無幾多個，我啲屋企人、姨媽、姑姐咁都有買，話全部係我買，但其實唔係，大約買咗五、六間左右，百六萬一間（約共960萬）。（幾時收樓？）應該係2020年初，發展商都幾好，我哋依家等於畀錢佢哋起樓。」

對於有指大灣區地產有升值潛力，他十分認同：「係呀，有高鐵，發展得好犀利，依家我哋買嘅係叫政府限價盤，政府限咗唔能夠高過幾多錢，同埋三至五年之內唔能夠轉讓，到可以賣嘅時候，我會再睇吓點（指放盤定繼續持有），好多嘢好難講，但地產最穩陣，是但喺內地買層樓擺幾年都會升，有時仲會升到一個開。」不過，投資樓花當然有一定風險，他也笑言：「依家都求神拜佛，希望個盤唔好爛尾或者有人走佬，準時交樓，呢啲嘢真係好難講，以前買樓都唔係未試過爛尾嘅情況，我都瀨過一次嘢㗎喇！」

提到早年曾遇「爛尾」事件，啟華回憶說：「好耐之前，都十幾年前，當時內地公司搵我哋拍戲，拍完戲又話公司有搞商場舖，叫我哋可以內部認購平畀我哋，我咪將啲片酬拎去買舖，點知最後就爛咗尾走咗佬，間公司冇咗咩都冇晒。（損失幾多？）當年二十幾萬左右。」