整容失敗？迪子笑言：點解唔似混血兒

歌手迪子去年10月在首爾發生跌倒意外，面撼鐵櫈險毀容，幸獲韓國整容醫院協助，早於3月13日在韓國接受三項整容手術，包括：自體脂肪移植面部輪廓塑形、自體軟骨鼻塑形、削顴骨。

她接受東網訪問時稱，未發生意外前從未想過整容，但意外發生致毀容才一試，她笑言整容效果令她「失望」，不過又強調只是微調：「我都有講笑話，點解我整完唔似混血兒，係咪失敗咗，我都唔想太唔同樣，我唔想阿媽都唔認得我，其實整完後，我啲朋友以為我意外後未消腫，唔知係整容嗰隻腫，亦唔覺得我整咗，但因為腫到成個豬頭咁，所以我匿埋咗個幾兩個月。（可有整其他地方？）眼冇整，鼻只係整咗鼻頭，面就削咗骨，你唔覺得我塊面咁大咩？」問她可會整容整上癮？她說：「未知，如果整容公司再贊助我先再算啦。（變靚後有冇男仔追？）又冇喎。」她又說整容前曾掙扎過，但其母比她更開通，沒有反對。

問她做手術時可害怕？她說：「瞓上手術先識驚，手術做咗幾個鐘，要全身麻醉，之後就腫晒咁返香港。」又說夠膽整容就要夠膽認，更想開創先河，她同韓國醫院多次接觸及溝通後，決定由意外、毁容、整容手術、康復期間嘅過程將整容大公開，不過整容公司不許拍手術過程，故只拍下整容前及後的實況片，再放在其新歌《美哉》MV中，她說：「個MV係整容真人騷，3號晚會喺YouTube播，（條片有腫到豬頭樣，唔怕破壞形象？）我都冇形象可言，可能做創作嘅人較勇啦。」她又指寫咗新歌係想鼓勵自己：「我深刻體會，在以貌取人嘅商業社會好難生存，所以我有感而發寫咗呢首歌，唔想畀自己活喺悲傷裏面，不如化悲痛為力量。」