訂婚傳聞被好兄弟擺上枱　李思捷避談兼離場

由藝人王祖藍、阮兆祥、李思捷組成的「福祿壽」，早前在香港舉行十周年演唱會，昨晚在澳門新濠影滙綜藝館舉行澳門站演唱會，之前盛傳秘密封盤訂婚的李思捷，甫開騷即遭兩位拍擋將緋聞擺上枱。祖藍先笑言若有現場觀眾認李思捷做老竇，李思捷會即場派錢，惹來全場起哄，祖藍再寸嘴表示：「澳門人真係好不幸，因為佢哋連李思捷都要爭住認老竇，真係家門不幸喇！」阮兆祥亦要求思捷為「封盤」解畫，李思捷隨即離場避談，十分搞笑。

演唱會繼續以集體回憶做主題，有細細粒以肥姐造型登場大唱《歡樂今宵》主題曲，思捷以鄭少秋造型與細細粒合唱《愛在心內暖》，兩人並愈哄愈埋兼借位「狂嘴」，引來全場哄笑。福祿壽先後模仿譚校長（譚詠麟）TONE獻唱《野孩子》、《祝福你》以及《LONDON BRIDGE IS FALLING DOWN》成為全新環節，祖藍獻唱《祝福你》時，又瘋狂模仿譚校長的抖腳姿勢，事後遭思捷寸爆：「喂！祖藍！你滴咗兩滴尿出嚟呀！」祖藍即回敬：「真係人衰諗乜都衰。」而遭思捷取笑唱歌似講粗口的阮兆祥，反擊：「咩呀！我呢個係牛津發音。」另外，思捷扮林子祥唱《敢愛敢做》、祖藍扮葉啟田唱《愛拼才會贏》，阮兆祥則扮玉置浩二唱《月半彎》，期間他一度唱至眼濕濕，十分感性。澳門站後，福祿壽八月將進軍馬來西亞。