搞校服P！抗癌歌手李明蔚29歲慶生勁Happy

抗癌歌手李明蔚（Sarena）日前29歲生日，家人同好友都分別為佢搞咗慶生派對，令佢相當感動：「屋企人個派對，就以粉紅色為主題，表妹知道我鍾意粉紅色，所以佢花盡心思幫我布置場地，又預備氣球同一個靚靚獨角獸嘅蛋糕，一家人圍住傾偈唱歌，真係好開心！」

另一班好友就為佢搞咗個校服派對，Sarena話：「今次係我第一次參加嘅校服派對，最重要係呢班朋友係一班癌症康復者同病友，佢哋仲好細心安排食物，因為知道我吞食物有困難，好多謝佢哋。」問到生日願望？Sarena希望自己同身邊嘅人都身體健康同快樂：「我又可以繼續完成自己想做嘅事，做個有用嘅人。（踏入2字尾，心情點呀？）時間過得好快，唔會諗咁多，希望依家可以做多啲青春嘅嘢！」