偶像夢幻滅！黃建東疊埋心水做實力派

藝人黃建東（Derek）參選2011年香港先生入行，至2016年憑惡搞日本洗腦歌《PPAP》才為人熟悉，自此工作量大增，一連參與多套劇集演出，剛拍畢新劇《丫鬟大聯盟》的他，被指身形隨工作量而倍增，他笑說：「我拍劇唔瞓覺會肥，因為拍劇好多時通宵，等埋位嘅時候就係咁食嘢，拍《丫鬟大聯盟》嘅時候，係成個劇組都肥咗，因為大家都會買一箱嘢食返嚟，有鹹蛋黃魚皮、薯片、朱古力同蛋糕，愈食就愈有福氣。」

恨有粉絲尖叫

講到初入行時身形瘦削，Derek指大家反而喜歡他「圓碌碌」：「啲人覺得我依家好睇啲，比較親和啲。」至於有否想過走偶像派路線？他笑言：「由細到大都係我志願，但今世嘅人生都係唔會達成，我細個好恨做偶像派歌手，試過喺Event見到一個歌手有100個人為佢尖叫，我就諗如果自己係咁幾好呢？但係諗到自己先天同後天嘅條件局限，惟有鍛煉自己嘅演藝才能，希望有日畀人話係實力派！」

密謀推出情歌

此外，他透露今年內會推出新歌和繼續拍搞笑片：「自己作緊歌，或者係二次創作。」又坦言不少客戶邀請他跟緋聞女友瑪姬合唱情歌，所以希望推出屬於自己的情歌，又不忘搞笑：「我哋情侶檔上陣，係年紀最大同最老嘅樂壇新人。」

----------------------------

東網巨星開咗ig喇，大家快啲follow啦！

https://bit.ly/2JjSVcr