網民不應出言攻擊！陳柏宇撐鍾晴冇惡意

愛狗如命的歌手陳柏宇（Jason），太太符曉薇正佗着B女，早前Jason透露因家中兩頭愛犬經常打交，令他束手無策，因擔心情況不受控制，曾表示最壞打算可能要將狗狗送朋友家暫住，怎知該言論竟然惹來「棄養」風波，遭網民插爆要B唔要狗。

要接納不同意見

對於兒童節目主持鍾晴的「憎狗論」遭圍插，Jason回覆東網說：「我睇完條片之後，唔知佢本身有冇養狗，但我覺得唔係個個都一定要鍾意狗嘅，係咪先？我哋唔可以唔畀人哋對狗有唔同意見，如果我哋好唔鍾意啲爬蟲類，例如蜥蝪、蛇呀，覺得好核突、好恐怖，但原來有啲人好鍾意，咁唔通人哋又會話有冇搞錯呀，你哋點可以咁樣講嘢！」

覺得鍾晴冇惡意

他指貓狗是日常生活會出現的家居寵物，因此對這類動物有一種特別感情：「但我覺得大家唔需要太過去攻擊佢，因為佢唔鍾意，又或者佢覺得工廠嘅狗好污糟，每個人都有權去講自己嘅意見，佢只係發表佢唔喜歡嗰類型嘅狗，佢唔係做一啲嘢去傷害或者整啲狗，唔係因為佢唔鍾意啲狗而去踢佢一腳，佢只係驚同唔喜歡狗啫，我覺得冇得咁話人。」