林昕雨食兩家茶禮知衰:聽日向何紫綸道歉

20180713
東網電視
更多新聞短片
林昕雨(右)表示明天會向何紫綸道歉。
黃夏蕙契女林昕雨(Eva)由於「食兩家茶禮」,到《香港小姐》面試又參與《亞洲太平洋國際小姐》選美,最終被《亞洲太平洋國際小姐》發聲明炮轟,而擔任該選美活動的佳麗導師及形象指導何紫綸更明言絕不姑息。
自事件曝光後林昕雨立即認錯,她透露由於知道何紫綸(Ann)現在怒氣難消,不想火上加油,但她說:「件事真係自己唔啱,Ann教咗我好多嘢,我係銘記於心,好想親口同佢道歉,之前諗住等佢下咗火先搵佢,但係思前想後,要表達誠意,決定聽日登門道歉,負荊請罪,希望佢原諒我,大人不記小人過。」
林昕雨今晚與契媽黃夏蕙出席慈善活動,問到全程都拖實契媽手的Eva是否收到律師信時,她顯得「驚青」話係,講到律師信內容,她表示何紫綸向她提出Proposal:「睇吓係賠償定道歉聲明,我Propose咗道歉聲明。(喺邊度登?)要睇佢哋接唔接受呢個方案,細節會再傾,要等佢哋答覆。(咁賠償係幾多錢?)實際上冇講。」黃夏蕙搶答話簽合約時沒有列明要賠幾多,所以沒有損失:「唔通話賠一百萬呀?(如果真係要賠一大舊錢呢?)唔會嘅,你話咁就咁?世界有理由同法律,咁多錢點搵畀你?人哋都未紅未搵到錢。(咁你簽咗合約要履行。)咪履行囉,唔係唔想履行,係佢根本都唔知。」同時Eva都贊同講法,並表示只以為答應參加選美,非經理人合約。
黃夏蕙力撐
身旁的契媽黃夏蕙即幫口比喻話報學校都會報幾間,又樂觀笑話自己都是「人版」,更會力撐契女:「係咁㗎啦!冇是非就唔紅㗎啦,呢個世界係咁,我到今日都好多是非!(佢可能有官非喎!)唔怕嘅!出咗信有咩所謂啫,梗係要撐啦!我唔撐佢邊個撐?(邊方面撐佢呀?精神定金錢?)乜嘢都撐!金錢、精神全力以赴,因為我係佢阿媽嚟。」會否跟Eva講下次唔好再生事?她慨嘆話當然會:「佢仲細,根本冇經驗,我好似佢咁廿幾歲嘅時候都係乜嘢都唔識,戇居居㗎真係,佢已經叻過我。」
入行為幫人
Eva坦言現時兩邊都退選,亦都怕再參選:「冇辦法啦做好自己啦。(即係唔會再踏足呢一行?)會喺呢行,因為我想要嘅係知名度,想幫多啲人,同被受欺凌嘅人講加油。(但依家係你要加油喎。)一齊加油。」她又承認今次太心急:「因為好想要知名度去幫人。(依家你要人幫喎。)唔緊要,施比受更有福,互相幫助。」
----------------------------
東網巨星開咗ig喇,大家快啲follow啦!