東方日報C1：王祖藍李亞男結婚三年宣布有喜

藝人王祖藍、李亞男昨日趁拍拖九周年紀念日大晒BB超聲波照，公布「有喜」，並指一切都在「計劃」之內。正當各方好友忙恭喜之際，向來諗頭多多的祖藍竟拿自己1米63與太太1米75的身高開盤，估吓將來BB的身高似爸爸還是媽媽，認真搞鬼。

現年38歲的祖藍與33歲的李亞男（Leanne）多年前譜出「長短腳之戀」，更於2015年情人節在香港主題公園舉行婚禮。婚後三年不斷被催生B，直至昨日二人終於公布喜訊！亞男在社交網留言說：「很興奮感恩可以在這個特別日子，宣布我和祖藍將迎接一個新生命嘅來臨！」

開口中實現計劃

而榮升爸爸的祖藍，受訪時笑言：「我哋拍拖嗰陣係2009年，咁啱9年後有個小朋友，希望所有嘢都可以長長久久啦，亦都好感謝上帝，幫我哋安排晒所有嘢喺計劃入面進行，之前應承過Leanne搬出嚟二人世界後，過兩年左右先有小朋友，依家真係實現到，真係好感恩。」

祖藍又笑指其公司非常旺丁，先後有兩名員工懷孕，現時加埋亞男湊夠三個：「如果想生B，入嚟我公司做啦！」他又叮囑大家幫忙「睇住」老婆：「做媽媽真係好辛苦，佢為BB付出咗好多，又睇書又改變飲食習慣，好緊張咁去預備好多嘢，所以麻煩大家照顧吓佢。」計仔多多的祖藍不忘搞笑一番：「大家最近除咗睇法國定克羅地亞贏之外，我建議開多個盤，就係究竟將來BB嘅高度係會似我定似阿媽呢？相信都幾啱用嚟打牙骹戰。」

緊張媽媽向姊妹取經

至於向來十分喜歡小朋友的亞男則表示：「好開心終於做媽媽，知道嗰陣好驚喜，有啲唔敢相信。雖然我哋係Plan今年做爹哋媽咪，但冇諗過咁快實現到，真係好感恩。其實仔定女都冇所謂，最緊要BB成長過程夠健康同開心。」並已向好姊妹報喜：「我有向Linda（鍾嘉欣）同宋熙年取經，問定有咩唔食得、可唔可以做運動，好多問題想問，始終自己冇經驗。」為了BB着想，她已少吃甜品及飲咖啡：「飲少咗好多咖啡，雖然呢啲都只係好小事，但已令我體會到做媽媽需要付出好多愛。」

近年祖藍密密北上吸金，由西貢村屋住到千三萬獨立屋，2015年更豪擲逾億購入大埔一個頂層連私人泳池的3,000呎複式單位作為愛巢，並成立經理人公司。而亞男則樂做背後女人，甚少幕前演出，今年更推出個人烹飪書，相信將要大住個肚出席書展簽名會。

更多新聞，請瀏覽東方日報網頁：

http://orientaldaily.on.cc/