金句大晒冷！《BB來了》引共鳴

20180714
  • 東網電視
    更多新聞短片
    《BB來了》大爆金句，仲引起觀眾共鳴添！
    無綫劇集《BB來了》開播冇耐就贏盡口碑，除咗因為演員嘅演技出色之外，當中寫實貼地嘅劇情，以及啜核抵死嘅金句，亦令唔少媽媽感同身受，大讚有共鳴！
    「有冇咁容易中呀？」
    劇中李佳芯（Ali）同黎諾懿飾演一對新婚夫妻，二人一直未有打算生小朋友，當得知Ali意外懷孕時，黎諾懿露出驚訝神色，仲大爆：「有冇咁容易中呀？」充分體現出新手爸爸嗰種驚慌失措。
    「女人要有娘家返先矜貴」
    正所謂屋企人幾時都係最強大嘅後盾，而對於遇上婆媳問題嘅人妻嚟講，娘家簡直好比一個避風港，劇中一句「女人要有娘家返先矜貴」真係道出咗唔少已婚婦女嘅心聲。
    「事業身材樣貌全部即時ALL IN」
    Ali本來正值事業搏殺期，點知就因為有咗BB而打亂晒所有計劃，佢更因為極度擔心而大爆：「你知唔知一個女仔有咗代表啲咩呀？係事業身材樣貌全部即時ALL IN呀！」事實上好多媽媽都為咗照顧仔女而犧牲私人時間，母愛認真偉大！
    「舊年嘅我已經死咗」
    黎諾懿準備同Ali慶祝結婚周年紀念，本來以為老婆會以性感睡衣迎接，點知榮升人母嘅Ali只係關心BB，完全忘記結婚周年，仲話：「舊年嘅我已經死咗啦！」睇嚟做咗媽媽真係唔同啲，仔女永遠擺喺第一位，連老公都冇情講。
    「BB一世人得一次滿月㗎」
    Ali因為乳線發炎入院，但佢最關心嘅唔係自己，反而係喺屋企嘅BB，講到嗰日咁啱係BB嘅滿月，Ali更爆喊表示：「BB一世人得一次滿月㗎咋！」睇到唔少媽媽都眼濕濕。
    「女人做咗阿媽，就係有母性冇人性」
    除咗新手媽媽有180度轉變，新手爸爸同樣面對「失寵」問題，因為老婆最愛嘅唔再係自己而係仔女，其中黎諾懿差啲畀車撞，點知Ali只顧BB、完全冇關心過佢，岳父羅樂林爆出嘅一句「女人做咗阿媽，就係有母性冇人性，慢慢習慣啦！」簡直講出男人心中嘅無奈。