夠畀首期！「傻女」劉佩玥自資出書追夢

書展開鑼，港姐出身的劉佩玥（Moon）今年首度加入戰團，自資六位數推出文字相集，坦言想30歲前完成出書夢想，故不惜工本，遠赴美國拍攝照片，親自寫下一字一句，望大家看到不一樣的「劉佩玥」！

劉佩玥親力親為籌備自己的第一本文字相集，整個過程需時半年，如此費神，全因一個「夢」字：「呢個係我好耐以嚟嘅夢想，30歲前一定要出一本書！」為圓夢更耗盡六位數積蓄：「呢個係我自己嘅Project，我問公司可唔可以出本書？公司好好，幫我安排咗《TVB周刊》幫我出，但呢樣係我自己好想做嘅嘢，所以就自資，連出版費、排版、編輯都係自己畀錢去做，唔係為咗宣傳同商業嘅嘢，我想一手一腳去打造一個紀錄。」她指每個人理想不一樣，有些人會選擇花這筆錢做首期，她就選擇出書。

被嫌口水太多

講到書展如戰場，其作品有何出奇制勝之處？Moon笑言：「我寫咗好多好多字，多到編輯叫我Cut字，可能我口水太多，想表達太多真心嘢，覺得女藝人唔一定要賣性感或者賣相片，文字就係嗰本書最重要嘅嘢，希望大家睇到我嘅字。」她續說：「平時我同記者朋友講感情狀況，都係好短時間同埋好表面嗰層，但係我嘅愛情觀唔只咁表面，會講多啲內心嘅嘢，有講失戀嘅感受，以前想要嘅男朋友係點，依家有咩轉變。」

美國揸車嚇窒老竇

Moon的相集更有「三點式」照片：「哈哈，唔講唔知嗰件係三點式，好低調嘅性感，其他造型都係自己揀。」講到拍攝地點，她即滔滔不絕：「我哋一行三個人，我、化妝師同攝影師 ，佢哋本身去美國工作，我飛過去就佢哋。」她在當地還做了一件驚險事：「認識我嘅人都好擔心，就係我喺美國揸車，我同父母講我去美國揸車，佢兩個呆咗，我呃Daddy已畀晒錢，佢就死死地氣同我去排國際牌，佢驚我有意外，好彩最後冇事。」

場地：Mini Hotel