病重馬桂燦約食飯　葛民輝以為最後晚餐

藝人葛民輝到電台為廣播劇擔任嘉賓，提到髮型師好友馬桂燦（Jacky Ma）接受胃腫瘤手術後與他聚會，並將合照放到社交網，阿葛說：「係呀，佢約我同Jan（林海峰）食飯，當時佢話只約幾個朋友，我收到都嚇一嚇唔敢問，以為係咩最後的晚餐，點知出到嚟好大班人，Jacky亦都好開心、好High！佢話依家冇咗個胃，食嘢直落唔知飽，仲拉高件衫晒佢條蚯蚓！我同阿Jan都好開心，因為都好耐冇認真約出來食餐飯。」阿葛表示17歲已與Jacky認識，大家已是三十多年老友。

阿葛早前被影到四出睇舖，問到是否有新搞作？他笑言：「我係做三行（裝修）咋！幫朋友睇舖，慘喇睇咗兩個幾月，因為我多多意見，由深水埗睇到上環，又睇到大坑！因為唔想租錯地方，到時咪又係我上身！（夾一份？）唔會啦！我忍唔到手，又冇錢嘅概念，當時軟硬開騷都冇諗點翻本，所以我做唔到決策同投資。」