《深宮計》帶挈！胡定欣馬浚偉加國騷搵銀

藝人馬浚偉及胡定欣主演的電視劇《宮心計2深宮計》暫時是全年收視冠軍，帶挈劇中演員有更多工作機會。兩位主角日前完成11場舞台劇後，就飛往加拿大多倫多開騷搵真銀。今次是定欣首次到多倫多開騷，但觀眾相當熱情，更有人衝上台跟她和馬浚偉合照，她說：「《深宮計》真係帶畀我無限機會，其實呢個演唱會喺一年多前已經落實，當時係主辦單位入咗嚟TVB，我哋拍緊《深宮計》嘅時候喺化妝間度傾，主辦方落重本，仲同TVB買咗版權做1比1劇照人形紙牌畀觀眾影相。多謝小青姐（監製梅小青）幫我哋精挑細選兩張好靚嘅皇上、皇后造型嘅相。」

談到不少當地觀眾仍投入在《深》劇中，她笑言觀眾見到他們時好像參與儀式觀禮一樣：「估唔到北美洲咁遠，喺街邊同埋演出時都不停有人嗌我做『王臻』或者『皇后』，仲話見到我哋以為係真係微服出巡，好感動！」

此行她亦有趁機休息，主辦單位特地帶她和馬浚偉到旅遊景點睇尼加拉瓜瀑布及品嘗譚詠麟推介的生蠔餐廳，旅程難忘。