升降台故障潘瑋柏驚到忘詞　G.E.M.高音拯救

內地選秀節目《中國新說唱》熱播中，新一集各位導師輪流演出，向選手拉票加入自己嘅戰隊，點知潘瑋柏同G.E.M.（鄧紫棋）表演時，潘瑋柏唱咗頭幾句就突然唔記得歌詞，好彩最後佢都瞬即回復狀態，順利完成演出。

由潘瑋柏同G.E.M.組成嘅「攀登戰隊」上台獻唱台灣樂隊信樂團嘅作品《死了都要愛》，但喺準備出場前升降台突然出現故障，搞到演出要延遲30分鐘！未知係咪受呢段小插曲影響，潘瑋柏一上台就顯得非常緊張，第一句就早咗唱，唱到第五句仲唔記得歌詞，嚇到拍檔G.E.M.都即刻回頭望望發生咩事。不過素來有經驗嘅潘瑋柏秒速收拾心情，仲愈唱愈進入狀態，加埋G.E.M.勁有爆炸力嘅歌聲，成功將全場氣氛推到最High！

雖然演出順利完成，而且大部分選手都聽唔出有失誤，以為係佢哋刻意安排嘅橋段，但係潘瑋柏依然相當自責，仲話：「太爛了，我覺得我很對不起紫棋，對不起選手們，也對不起觀眾。」至於G.E.M.就安慰指係舞台出現狀況先影響演出，仲大讚潘瑋柏完美示範「執生」。唔少網民都話反而因為唔記得歌詞而令演出更加有驚喜，並指G.E.M.冇怪拍檔之餘仲處處維護，非常窩心。

網民有話兒：

Gxxy bxxxxse of TxxxxCE：雖然忘詞了，可是還是超炸的

Bxxxxu Cxxxxxel：我覺得因為這個不完美 反而讓這個表演更完美

al rxxxy：以前對鄧紫棋不熟，看了節目覺得她常真性情流露，個性很可愛。很強大的歌手！

J Txxxx：忘詞又怎樣，最重要是如何拉回來。你是可以的！你很棒