獲康文署高層致歉　歐錦棠：有保留靜觀其變

藝人歐錦棠今日出席電影舉行開鏡儀式，以一身看似教師造型現身的他被記者笑問是否飾演老師？他笑住「開估」話：「成個阿Sir咁都唔係阿Sir，係阿女（談善言飾演）嘅老竇，見到佢隻眼咁細就似我啦，有父女相呀！同麥方喬（原名為麥家琪）係兩公婆，我係做日本團嗰啲導遊，所以會成日講日文。（你識講日文？）本身識嘅有時都會喺劇本加兩句。」

他表示戲中因為經常對日本人，故對家人都好有規律：「但一啲都唔惡，怕老婆，又錫嗰女，所以講到嗰女性傾向有啲偏差，都OK，好Open嘅，雖然套戲講呢啲議題，但都係以輕喜劇處理，呢啲都好Common。」

及後提到早前於社交平台上「發炮」，指有康文署職員作出恐嚇，他先抵死笑話自己成日都好勞氣，然後正經表示事情已解決：「首先都要多謝各位傳媒幫手，我喺網上面呻咗一嘢，大家都幫手轉載，因為咁樣，署方就喺見報當日即刻約見，有兩位高層親自嚟開會，大家有好深嘅交流，我都講出我嘅不滿同顧慮，佢哋亦都好充分理解件事，雙方一直合作無間，但點解嚟咗嗰新人會咁呢？但佢哋都好客氣啦，代表署方好有誠意咁致歉，咁我係接受，一人讓一步，但我有保留嘅，靜觀其變啦。」他續指並非需要「人頭落地」，只想雙方有良好的溝通，維繫當中的「夥伴」關係。