「高球女神」歐詠珊揮出22吋腰 竟想扮醜!

20180812
東網電視
更多新聞短片
歐詠珊天生食極唔肥,真係令人羨慕呀!
「高球女神」歐詠珊(Janice)天生食極唔肥,一直保持22吋小蠻腰,令人羨慕又妒忌!去年出寫真的她轉戰影壇,客串杜琪峰電影,形象斯文的她自爆私下男仔頭不修邊幅,想豁出去拍喜劇扮醜角。
身形Fit爆的模特兒歐詠珊(Janice)喜歡打高爾夫球,她表示因可跟大自然接觸,而且揮桿時能將所有不快揮走,未知是否打高球的關係,Janice擁有22吋小蠻腰,無論擺任何甫士都Fit爆冇肥肉。
Janice笑說:「我食好多嘢㗎!食自助餐永遠係食到最後嗰個,但條腰都唔會點粗,不過下身就偏有肉,所以我都唔可以懶,晚晚做瑜伽拉筋,其實有一輪我都多咗鬼祟肉,全靠做番運動去減。」
去年Janice跟姊妹歐詠怡及歐詠寶出寫真,甚受歡迎,今年三女分開發展,Janice嘗試拍戲,有機會拍攝導演杜琪峰的電影,返廣州取景飾演一名拳賽Ring Girl,她表示過程難忘:「學咗好多嘢,最新鮮係要戴一個藍色假髮,造型好靚,不過就噏到成頭汗。(使唔使性感?)都唔算,只係低胸裙。(性感尺度?)感覺健康就OK,底線係三點式。」
談吐溫文的Janice直言想顛覆一向的形象,想戴假哨牙、化癦屎妝扮醜角拍喜劇。她又自爆私下其實相當男仔頭:「我平時係打坐咁坐,見到啲大梯級又照跳過去,又唔怕污糟,都有少少不修邊幅,每次拍拖我好快展示真嘅一面,唔會呃住對方,但一般男仔都鍾意我咁Man嘅性格,覺得我唔造作又冇所謂。」
Profile
歐詠珊Janice
身高:1米63
三圍:32C、22、33
興趣:瑜伽、高爾夫球、旅行