「洛神」舞震撼網民　秦嵐原來唔識跳舞

內地劇集《延禧攻略》熱播中，劇集帶挈唔少演員彈起，其中畀佘詩曼及其他妃嬪加害而落得悲慘下場嘅王后秦嵐，喺劇中更因化身「洛神」跳舞嘅驚艷一幕而成為熱話。不過佢近日上內地跳舞比賽節目《新舞林大會》，就自爆原來唔識跳舞，一直都只係靠替身同演技搭救！

其實秦嵐以往同「跳舞」有好大淵源，除咗喺劇集《還珠格格3》飾演擅長跳舞嘅「知畫」，仲曾經參與跳舞比賽節目《舞動奇蹟》，同無綫藝人黃致豪（前名黃長興）組隊添！雖然佢經驗十足，但今次上《新舞林大會》依然相當緊張，遲遲都唔敢上台表演，仲直言好想返屋企！不過，當佢一上到台就判若兩人，跳起探戈上嚟有板有眼，舉手投足都非常吸睛，即刻成為全場焦點，仲令評判老師暗示想做佢嘅男舞伴添！

但係秦嵐一啲都冇自滿，佢自言喺觀眾眼中「舞技出眾」嘅形象，同現實中嘅自己有好大出入，仲表示想趁呢次機會好好鑽研「舞功」，並透過舞蹈將歡樂帶畀大家。唔少網民都大讚佢謙虛，並表示希望佢可以喺呢個舞台上重現劇中嘅「洛神舞」。

網民有話兒：

金xx啊：我以為秦嵐本身很會跳舞的

哇xxxvxx哇：娘娘，我能當你的舞伴嗎？

_韋xxx笑：跳洛神舞的話一定贏！

行動xxxx幻想：娘娘古裝時裝都一樣美~