前度個個女神級!彭于晏搞乜情歸大媽?

20180815
東網電視
更多新聞短片
彭于晏之前啲緋聞女友全部都係女神級,難怪大家對佢疑似撻着許晴咁大反應。

80後嘅台灣超筍盤彭于晏,靚仔唔使講,仲有六舊腹肌,係一眾含春女嘅理想老公對象。最近爆出「老公仔」竟然傳搭上做家姐都嫌老、大佢成13年嘅內地女星許晴,眾「彭太」群情洶湧,刀仔拮大髀,大叫心碎實屬正常,皆因晴姐姐都成49歲,如果佢好命,一早已經係「大媽級」湊緊仔喇!其實彭于晏今勻同許晴搞曖昧真係匪夷所思,皆因佢過去嘅緋聞女星靚絕中港台,位位年輕、貌美、身材勁,唔通佢近排濕熱,所以要食啲「老薑」驅驅風?

蔡依林

除咗周杰倫、羅志祥曾經係「乳牛」喜好者外,彭于晏都Like過台灣「G奶天后」蔡依林,兩人識於微時,當年一個「男神」一個「天后」相當匹配,曾經畀人發現蔡依林去咗彭于晏度玩通宵,但玩乜就冇人知!不過彭于晏位經理人就好緊張,捉咗佢「照肺」講明唔淮佢去搵蔡依林,搞到彭于晏冇晒心機。

舒淇

公司唔畀搵蔡依林,彭于晏唯有搵另一位「乳神」舒淇,兩人曾經合作MV《非愛不可》,型男美女喺MV度打壁球「友誼波」,明明開緊餐,舒淇又突然玩飛枱布,呢一幕令人諗起舒淇喺舊愛黎明首《全日愛》嘅MV度都飛過人字拖,唔通舒淇「飛」嗰吓動作,係有寓意?

林珈安

台灣女子組合「Rommie」成員林珈安,雖然喺香港知名度唔高,但大家唔識唔要緊,最緊要彭于晏知佢係乜水,仲畀地址佢夜訪彭宅兩粒鐘,之後仲好有風度咁車埋個女仔出去行街街!而彭于晏嘅經理人又再閃出嚟,話林珈安只係佢一個女性朋友,大家互動唔代表乜嘢。

陳靜

講完台灣代表,「E神」陳靜都曾經為港女爭光,有傳佢兩個係喺《十二金鴨》中擦出愛火花,仲秘密拍咗大拿拿四個月拖咁長!陳靜鍾意叫彭于晏「大象」,暗示有人「好長」,唔好心邪住,長就係長,不過佢嘅意思係話彭于晏手臂似大象,而彭于晏亦好喜愛被叫大象,仲喺網上貼張大象相添!

張鈞甯

彭于晏其後回歸台妹懷抱,同張鈞甯傳到真嘅一樣!話佢哋兩個一齊去睇戲,仲係睇彭于晏有份做嘅《悟空傳》,佢兩個甜到喺微博甫兩張戲票相,彭于晏仲好似怕唔夠閃咁,轉發張鈞甯嘅微博直呼:「哇塞,女神吶。」

劉詩詩

內地女星劉詩詩同當時未係老公嘅吳奇隆拍拖期間,就因為同彭于晏拍劇集《風中奇緣》時傳有「景轟」,話佢哋兩個拍劇時已經成日眉來眼去,就算齣劇拍完,本應曲終人散,不過嗰陣就被人發現佢哋成日喺私訊「暗度陳倉」!

----------------------------
東網巨星開咗ig喇,大家快啲follow啦!
https://bit.ly/2JjSVcr