【五兄弟拍住上】鄭伊健受傷　陳小春整親腰

藝人錢嘉樂首次執導的電影即將上映，電影主題曲由他演率領電影男主角兼好兄弟鄭伊健、陳小春、謝天華和林曉峰合唱，分別是廣東話版《一起衝一起闖》、國語版《一起來一起走》。日前他們百忙中抽空拍MV，他們更與廿幾位「兄弟」以全黑色造型示人，坐在已打烊的火鍋店內，氣勢磅礡。大家默契十足，難怪小春得戚說：「神一樣嘅同步！」

講到相隔5年再合體拍MV，嘉樂爆料指小春原本想獨唱主題曲，不過聽過Demo後改變主意，小春說：「一聽到旋律同歌詞，唔使再諗，一定係我哋五個一齊唱先得，太正喇！」而五兄弟異口同聲表示被歌詞感動，拍MV時一邊唱一邊勾起拍電影時的片段，伊健說：「今次拍電影，我哋去咗內蒙古、黑山、匈牙利、日本、台灣等地取景，點解唔喺香港拍呢？」導演嘉樂就說：「整個電影都以香港做基地，由籌備、開會、動作設計都喺香港，電影不經不覺由籌備上映，剛好3年。」

而林曉峰最難忘是兄弟飯敍，他說：「我哋識咗廿幾年，但各有各忙，齊人約出嚟食飯唔多過3次，因為今次拍電影一齊去咗好多地方，幾乎餐餐都一齊食飯。」至於平時chok爆的謝天華竟然扁嘴說：「我最難忘係去黑山囉，因為我冇份！」因為配合劇情，天華不用現身黑山外景部分，所以他每次聽到其他兄弟在當地拍攝時的趣事都感到不是味兒。嘉樂說：「我哋一直都好想其中一個景喺古蹟拍攝，黑山係首選，但無從入手。點知我哋嘅『老爸』曾志偉好朋友，就係當地六星級酒店嘅老闆，對方二話不說就借出場地畀我哋拍攝，我哋炸得好過癮！」

另外，戲中不乏飛車和動作場面，幸好大家都有驚無險，當中伊健開工幾天就受傷，而小春亦傷到腰，有一段時間不能躺着要跪在地上舒緩痛楚。嘉樂坦言心痛又感動。小春笑說：「見係你咋，平時我一早走咗，唔拍啦！」