揭心酸內情!阿嬌入行為咗錢 人生留憾事

20180822
東網電視
更多新聞短片
阿嬌自揭當初入娛樂圈係為咗錢,因為「要養家」,希望家人可以過得好!

組合Twins出身嘅鍾欣潼(阿嬌)同好姊妹蔡卓妍(阿Sa)一出道就大紅大紫,唱盡少女心聲,絕對係非常成功嘅組合,不過其實阿嬌並冇諗過入娛樂圈!佢喺大陸綜藝節目《舉杯呵呵喝》中,同主持們邊食嘢邊傾偈,吐盡心聲。

從未想過入行

阿嬌坦言當初入行係因為「要養家」:「希望我家人可以過得好!」當被問到「不是自己喜歡嗎?」阿嬌擰晒頭表示:「我從來未想過進這一行!」佢又覺得自己性格唔適合做呢行,不過其實好鍾意演戲。佢仲道出童年悲傷經歷,因為單親家庭出身,住喺唔同屋企到處漂泊,由幼稚園到小學轉咗7間學校,根本交唔到朋友,唔識同人溝通,而且身邊女比男多,所以一入行好怕同男仔講嘢,好怕醜!

希望有個開心童年

雖然阿嬌如今事業愛情得意,不過佢其實有一件憾事,如果能夠重回二十年前,佢都願意:「就是從頭再成長過,我就好像沒有童年一樣,我就希望有一個開心的童年。」令在場人士都非常心痛!而佢又坦言好想做媽媽,希望孩子有個快樂童年!

哽咽講爺爺

講起家庭,阿嬌又透露有個細16年嘅妹,係後父生,不過妹妹唔敢同佢講嘢,兩姊妹有啲距離!而被問到電話最唔捨得刪除嘅照片時,阿嬌就展示佢同爺爺舊照,佢講到當時冇花更多時間陪爺爺,更一度哽咽眼濕濕!

霸氣做自己

而組合就自然有比較,講到負評畀人話佢得個「靚」字,情緒智商低,阿嬌停一停霸氣咁話:「我情商低又怎樣?我就是要做回我自己!覺得我笨我蠢,我就是這樣呀!」人前風光背後辛酸,其實阿嬌一路走來都唔易!