Liam Gallagher被爆夜店打女友　發惡叉喉嚨

45歲英國歌手兼前Oasis成員Liam Gallagher出名火爆，不過近日竟被爆向拍拖4年的女友Debbie Gwyther動粗！有指二人日前與男友人於倫敦一間餐廳食完飯，大約十時就轉場到夜店，不過於場內吵大鑊，有知情人士指男方嘈嘈吓失晒控：「佢（Liam）好大力推佢（Debbie）去走廊，之後轉身走，女方即時跟住佢，Liam就突然轉番身，仲單手叉住女方喉嚨推佢，另一隻手同時拎住樽啤酒！」又指全場都聽到Liam不停大叫，鬧爆女友是女巫！

據悉Liam後來被賓客投訴後，被保安趕走，但他仍懶理Debbie於夜店爆喊，單拖離場。Debbie曾為Liam的助手，二人拍拖4年，兩年前於曾於公開場合嗌交。雙方至今仍未回應，Liam周五就於瑞士表演。