鬼節踩入亂葬崗！古天樂拍戲心慌慌

藝人古天樂（古仔）奪得「第16屆世界傑出華人獎」，由英皇集團主席楊受成博士和許冠文頒獎給他。當司儀宣布古仔獲獎時，台下即一片歡呼起哄聲，而他接下獎項時顯得一臉靦腆。問他是否好緊張？他直認：「本身覺得好具意義，第二件事係自己一直都係當有能力時就去做多啲事，幫多啲人，有能力就去貢獻畀大家。（下個目標係碩士？）冇諗咁多，只係諗住做自己想做嘅事，呢個獎已經係喜出望外，要做一啲對得住獎嘅事。」

冇打算慶祝

問可會慶祝獲獎？古仔坦言：「冇諗，一陣仲要開工，呢個星期日都忙緊《犯罪現場》嘅殺青，好多晚都通宵，早幾日又黃雨，仲要七月十四喺亂葬崗拍，以前喺電視台每逢拍郊外戲大家都會燒嘢食，今次話燒嘢食，大家即刻話唔好，怕燒燒吓好多人一齊嚟食喎！雙眼都唔敢周圍望，怕唔知睇到啲乜嘢。」你以前拍《陰陽路》都應該好大膽？他笑言：「咁拍特工戲，唔通就係身手不凡咩。（有冇遇過怪事？）咁又冇，聽嘅就多。」

保持低調

點為之對得住獎？古仔表示：「每個人都可以幫到人，做啲事貢獻畀社會，其實自己身邊嘅朋友每逢周六、周日都會去探訪一啲老人家同埋社會唔同嘅階層，呢啲係貢獻社會嘅責任。」講到他在內地已建成第100間學校？他謂關於慈善不多回應，保持低調，有能力就繼續去幫人。

自認工作狂

問電影煞科後可會放假休息？古仔謂：「因為之後都有電影要上，所以都只係有一兩日假。」古仔承認年中無休，大家指他是老闆，可給自己放假？他抵死笑說：「咁我要返去填form入紙，睇吓嗰條友批唔批！（條友即係邊個呀？）咪自己囉！」他認自己是工作狂，今日都是放半日假給自己來領獎。