開騷擔心回水　220磅小齊患三高冇人認得佢

歌手任賢齊最近為拍電影增肥，本來只有163磅的他，由年初開始狂食至今半年，肥到220磅，腰圍40吋。小齊說：「今次為藝術犧牲認真大！增肥已經被醫生驗出有三高，高血壓，血糖仲有脂肪肝！」由於特效化妝不及真人肥胖實，結果他被導演說服，跟印度影帝阿米爾汗一樣，先增肥，之後再減回原本體重。

增肥近半年，小齊感到肥人的辛苦，容易攰，大肚腩如懷胎十月，本來每天他都會做運動，為增肥減少了，由於吃消夜搞到胃酸倒流。電影目前還未開拍，但衣服已經要全部買過：「由本來着中碼，依家變咗大碼，加大碼！嚟到新加坡睇見自己張演唱會海報，張相係舊年影嘅，我個樣同張相已經唔同晒，擔心唔知觀眾見到個任肥齊會唔會叫回水？」台上小齊就跟觀眾說：「哎吔，大家係咪有啲認唔出我？」觀眾大笑，他說：「因為要拍電影，所以才變成肥佬！大家今日玩得開心啲，下次等瘦咗，記得再來睇我。」

九孔扮周董笑到爆

是次演唱會，小齊叫了老友九孔任嘉賓，九孔在台上扮周杰倫（周董）不停搞笑，令觀眾笑到噴飯，原來九孔為了扮周董，在開騷前打了個電話給周董打招呼，周董沒有反對，只回了： 「哈哈哈……」由於九孔之前沒去過聖陶沙玩，所以小齊趁休息之餘帶老友去環球片場玩一圈，二人不停影相留念。

三高唔敢玩過山車

小齊最開心是人頭湧湧的環球片場，竟然冇人認出他，但九孔被遊客叫停幾次影合照，九孔笑謂：「認識了任賢齊這麼多年，跟他外出，都是我等他被人叫停簽名影合照，終於難得今次天王無論人氣、身材都輸給我。」小齊就樂得輕鬆，大玩機動遊戲：「回復做平凡人其實真係唔錯！只係孕婦唔玩得過山車，我就唔玩喇，怕三高一陣心臟負荷唔到。」