相冇晒！鄭希怡IG遭入侵：要畀50美金拎番

近日IG接連發生黑客入侵事件，唔少圈中藝人都中招，當中包括歌手鄭希怡（Yumiko）及模特兒朱韻韻。呢日，Yumiko喺社交網發文，指尋日曾經無法登入IG用戶，甚至連所有發文都被清空，好彩最後聯絡咗IG官方成功解決問題，佢留言表示：「琴日開ig『很抱歉，無法登入』奇怪，密碼冇錯呀…再搜尋我帳戶名，全個ig被清空咗，冇曬（晒）所有post，倒抽一口涼氣，點解會咁？？？好彩ig好快send咗個email俾（畀）我，問我係咪轉咗電話資料，如果唔係，可以click條link入去…一登入，發現所有資料比人改曬（晒），包括名，密碼，個人簡介，電話等…現在帳戶攞返（番），但原本個名就用唔返（番）。因為收到對方通知，如果要攞返（番），$50美金（約392港元），唔該…寧願改到個名萬里長城咁長，都唔會屈服嘅…點都好，大家都要小心自己帳號，網上高手如雲，防得就防…最後多謝＠instagram 咁快手解決煩惱…」至於朱韻韻嘅IG用戶同樣曾被黑客入侵，不過現已成功取回帳戶。

未必報警

喺對帳戶被黑客入侵，Yumiko回覆東網說：「當時覺得好慌張，點解會咁嘅，入面二千幾個post全部冇晒，成個account好似吉咗咁樣，跟住Instagram聯絡咗我，問我係咪改過電話，如果冇就有條link畀我登入，咁我就搵番個account，但發覺入面所有資料都畀人改咗，包括名、密碼，聯絡電話所有嘢，我改番自己個名之後，發覺我原本嗰個名就已經畀佢哋登記咗，跟住都收到佢哋訊息，如果你想要番之前個名，就畀錢啦，依家就改過第二個名長啲囉，咁都冇理由屈服嘅。」

Yumiko表示將事件講出來，是希望大家將來如果遇到類似情況，就不用擔心，可以check番自己登記嘅郵箱，睇吓Instagram係咪會send條link畀你，可以好容易搵番自己個帳號。對於黑客向佢索取50元美金先可以攞番個帳戶，問到可有考慮報警？她說：「暫時冇乜損失，報警就未必，但希望講出嚟可以等大家小心啲。」

譚詠麟被假冒

另外，近日亦有人假冒譚詠麟（Alan）開設IG帳戶，Alan得知後喺網上發文表示：「再次提醒大家譚詠麟先生只有一個Instagram官方認證戶口＠alantam25，其他不明之戶口並不是他私人增設的戶口，藝能製作亦沒有為譚先生增設任何戶口。如大家收到任何不明戶口的邀請授權或由此等戶口發出的工作邀請，全部均未有得到譚先生及其公司藝能製作之授權，敬請大家留意。」

----------------------------

東網巨星開咗ig喇，大家快啲follow啦！

　https://bit.ly/2JjSVcr