港姐亞軍播種成功 鄧卓殷零是非原來險出事
20180903
東網電視
更多新聞短片
好似完全冇缺點咁嘅～
今屆港姐亞軍鄧卓殷（Amber）於選美問答環節中為組合農夫改名，點知一句「播種的機」令佢成功喺觀眾心目中留下種子！現年23歲、5呎3吋高嘅Amber，外形「的骰」樣子標致，成為不少網友心目中嘅女神，就算唔係冠軍都一樣「美貌與智慧並重」，除咗靚，讀書仲好叻，畢業於香港大學建築系，現職為「Architectural Trainee」，讀書期間，佢仲贏過建築設計獎，愛心爆棚嘅佢唔怕辛苦，曾經去過非洲幫手起公廁、教小朋友讀書，令佢非常難忘。
動靜皆宜
除咗高學歷，Amber亦喺一位非常好動嘅女仔，學咗中國舞十幾年外，亦曾試過表演街舞，中西都難唔倒佢！平時亦經常參與戶外活動，行山、跳傘通通試過，仲鍾意周圍去膽色過人，喺唔少地方留下足迹，動靜皆宜，文「舞」雙全，似乎一啲缺點都冇！不過宅男噩耗就係佢已經有一位拍拖六年嘅男朋友喇！
同男友打風都打唔甩
Amber非常坦白，參選期間已講明有拖拍，雖然對方喺外國讀書，但關係Keep得非常之好，今次選港姐仲獲得對方支持，賽後更即Send短訊恭賀佢！Amber仲話男友對佢好有信心，就算加入娛樂圈，都會繼續支持佢，真係打風都打唔甩！
自稱「見習建築師」惹爭議
其實今屆港姐發生唔少是非，包括冠軍陳曉華被爆曾同歌手狄以達拍拖、季軍丁子田疑似假分手、落選港姐工藤佑采同師姐黃心穎隔空駁火等等，雖然身為亞軍嘅Amber由參選到當選近乎零是非，不過其實佢亦都唔係無風無浪！事關佢參選時填嘅職業係「見習建築師」，搞到惹嚟爭議，因為有業內人士指出若稱為建築師（Architect）係需要考牌，並直指任何人未喺建築師名冊中註冊而使用「建築師」職銜係屬於違法，而Amber就解釋因為行內對於佢嘅職位有唔同嘅英文說法，但好少用到中文名稱，所以就冇留意到呢一點。而呢個「誤會」網民似乎都唔係好介意，成功化險為宜嘅Amber似乎有個好開始，唔知之後又會有咩精彩表現呢？
----------------------------
東網巨星開咗ig喇，大家快啲follow啦！